အမေ့ မခံလိုသူများရဲ့ လက်ဆောင်နဲ့ အမေ့ရဲ့ရုံးခန်း

Sunday, November 28, 2010 10:45 AM | Posted by Unknown

ခင်နှင်းလွင် ၊ ရန်ကုန်
နိုဝင်ဘာ ၂၇၊ ၂၀၁၀ထိုနေ့ တစ်နေ့လုံး မျှော်လင့်ချက်အပြည့်နဲ့ လမ်းမပေါ်မှာရော NLD ရုံးချုပ် ရှေ့တွင် မှာပါ လူအုပ်စုကြီးက စိတ်အား ထက်သန်စွာဖြင့် စောင့်ဆိုင်း နေသကဲ့သို့ အန်အယ်ဒီ ရုံးချုပ်ရဲ့ အပေါ်ထပ် ဒေါ်အောင်ဆန်းစုကြည် အတွက် ပြင်ဆင်ပေးထားတဲ့ ၈ ပေ x ၁၄ ပေ သာသာ အကျယ် ရုံးခန်းလေး အတွင်းမှာလည်း ပိတ်ဖြူစ ပန်းချီကားချပ် တစ်ခု ….ထို့နောက် ကမ္ဘာ့မိတ်ဆွေ ဗမာ့ကျက်သရေ ဆိုတဲ့ ကဗျာ ခေါင်းစဉ်နှင့် အန်တီ့ပုံကို ကမ္ဘာ့နိုင်ငံ အလံများအလယ်တွင် ထည့်သွင်းထားတဲ့ ဓါတ်ပုံကားချပ်တစ်ခုတို့က ပြည်သူများနှင့်အတူ ထိုရုံးခန်းငယ်ကလေးထဲမှ စောင့်ကြိုနေခဲ့သည်။

ရွှေဂုံတိုင် NLD ရုံးရဲ့ ပထမထပ်မှာ ရှိတဲ့ အန်တီ့အတွက် ရည်ရွယ်ထားတဲ့ ရုံးခန်းဆီကို ရွှေဂုံတိုင်ရုံးထဲ ၀င်ဝင်ချင်း ဘယ်ဘက်အကြား လှေခါးမှ တက်သွားလျှင် ရောက်နိုင်သည်။

ရုံးခန်းလို့ ခေါ်ပေမဲ့ ရုံးခန်း အပြင် အဆင် အဆောင်ယောင် ဆိုလို့ တယ်လီဖုန်းတွေ၊ ကွန်ပျူတာ၊ ဖက်စ်၊ မိတ္တူကူးစက်လို စာအုပ်စင်လို အရာတွေ ဘာမှမရှိဘဲ သန့်ရှင်း ရှင်းလင်းတဲ့ အဆင် အပြင်ကိုသာ မြင်တွေ့ရသည်။

စားပွဲခင်း အဖြူစ ခင်းထားသည့် စားပွဲလေးပေါ်မှာ ထိုးထားသော နှင်းဆီပန်းတပွင့်၊ ဖိုင်တွဲစင်၊ ဘောပင်ထည့်သည့် ခွက်တခု ရှိသည်။ ရေ ထည့်သုံးသည့် လေအေးပေးစက် တစ်လုံး နှင့် ကုလားထိုင် အနည်းငယ်ကိုသာ တွေ့ရသည်။ အန်တီထိုင်ဖို့ ကြိမ်ထိုး ကုလားထိုင်ကို ပန်းရောင် အစွပ် စွပ်ထားသည်ကို တွေ့ရပြီး လေ၀င်လေထွက် ကောင်းပြီး အလင်းရောင် ကောင်းကောင်းရသည့် အခန်းတစ်ခန်းဟု ဆိုနိုင်သည်။

`ဒီပန်းချီကားချပ်က ဒေါ်အောင်ဆန်းစုကြည်ရဲ့ ၅၇နှစ်မြောက် မွေးနေ့အတွက် ဆိုပြီး အင်းစိန် အကျဉ်းထောင်နဲ့ အခြားအကျဉ်းထောင်က နိုင်ငံရေးနဲ့ အကျဉ်းကျသူတွေ စုပြီး ထိုးထားတဲ့ လက်ရာတွေပဲ။ ၂၀၀၂ ခုနှစ်ကတည်းက ပေးထားခဲ့တာ အခုမှ ဒေါ်အောင်ဆန်းစုကြည်ကို ပေးနိုင်မှာ။ ဒီထဲက တစ်ယောက်ဆို ထောင်ထဲမှာပဲ ကွယ်လွန်ခဲ့ရတယ်။ တစ်ချို့လည်း ထောင်ကလွတ်လို့ ပြည်ပ ရောက်တဲ့လူက ရောက်ကုန်ကြပြီ´ လို့ ပန်းချီကားကို လက်ညှိုးထိုးပြရင်း ဒေါက်တာဒေါ်မေ၀င်းမြင့်က ပြောသည်။

ချည်ထည် ပိတ်ဖြူစပေါ်တွင် ကမ္ဘာလုံးနှင့် ငြိမ်းချမ်းရေးပုံ၊ ခမောက်ပုံ၊ မန္တလေးနန်းတော် မျှော်စင်ပုံနှင့် ပစ်တိုင်းထောင်ပုံတို့ကို ရေးဆွဲထားပြီး ပုံများအားလုံးမှာ ချည်ရောင်စုံများနှင့် ရေးထိုးပုံဖော်ထားတာကို တွေ့မြင်နိုင်သည်။

ငြိမ်းချမ်းရေး ချိုးငှက် မြန်မာပြည်မှာ နားသင့်ပြီ ဆိုတဲ့ ခေါင်းစဉ်နှင့် ကမ္ဘာလုံးနှင့် ငြိမ်းချမ်းရေး ပုံကို ထောင် ၇ နှစ် ကျသူ မသန္တာဦး၊
ကျသည့် နေရာတွင် ထောင်နိုင်သည့် ပစ်တိုင်းထောင်၊ ရှားပါးတန်ဖိုး ကြီးသည့် နှင်းဆီနက် ပုံတို့ကို ထောင် ၂၉ နှစ် ချမှတ်ခံခဲ့ရသူ ဒေါ်ခင်ခင်လဲ့၊
သက်တင်ကြည်ဖြူ စိန်သရဖူ၊ ပြည်သူကြားရောက် NLD ခမောက်နှင့် ပြည်သူနှလုံး စု သိမ်းကြုံးယူ အစရှိသော ပုံကို ထောင် ၇နှစ်သာ ချမှတ်ခံရသော်လည်း အင်းစိန်ထောင်တွင် ၁၁နှစ် နေခဲ့ရသူ ဒေါက်တာဒေါ်မေ၀င်းမြင့်၊
မြန်မာ့နိုင်ငံရေး အလင်းပေးတယ် သုံးရောင်ချယ် အမည်နှင့်ပုံကို ၇နှစ်ကျခံခဲ့ရသူ ဒေါ်တင့်တင့်ဟန်၊
လှေခွက်ကြီးကျန် အလံမလှဲသော NLD လှေကလေးအမည်နှင့် ရိုးသားဖြူစင်သော သူငယ်တော်ရုပ်ကလေးကို ထောင် ၇နှစ် ကျခံရသော မခင်မာရီ၊
သူ မပါ ဘယ်ဟာမှ မပြီး၊ ဒို့တိုင်းဌာနီ ဗဟိုစည် ပုံကို ထောင် ၂၉နှစ် ချခံရသူ မသီတာထွေး၊
မပျက်ရိုးရာ ပြည်မြန်မာ, သစ္စာစောင့်ရှောက် ထီးချက်စောင့်, ငြိမ်းချမ်းသော ကမ္ဘာကို ထောင် အနှစ် ၂၀ ကျ မကြူကြူမာ၊
မိခင်မေတ္တာ ကြီးမားစွာတည့် ပုံကို ၂၉နှစ်ကျ ဒေါ်အေးသန်း၊
ဒို့ရှမ်းတောင်သူ တုနိုင်ရိုးလားကို ၁၇နှစ်ကျ မသန်းသန်းဌေး၊
၈၉ သေဒဏ် တကျွန်းစံပုံကို ပြစ်ဒဏ် သေဒဏ်နှင့် တကျွန်း ချခံခဲ့ရသူ ဒေါ်ညွှန့်
ညစ်ထေးမတင် မှိုသွင်ပြင်နှင့် လ၀န်းမကွယ် သုံးရောင်ချယ်ကို မခင်ဆွေရင် (ထောင်ဒဏ် ၁၇ နှစ် ချမှတ်ခံရသူ)၊
အမှန်အမှား လူထုအားတည့်ပုံကို ပြစ်ဒဏ် ၄၂နှစ်ကျ မခင်ဆွေထွန်း
စသည့် အမျိုးသမီး ၁၂ ဦးက ရေးထိုးထားခြင်း ဖြစ်ကြောင်း တွေ့ရသည်။

သာမန်အားဖြင့် ရိုးစင်းပြီးမထူးဆန်းလှသည့် ပန်းချီကားလေး တစ်ချပ် ဖြစ်သည်။ ရေးထိုးထားသည့် ခေါင်းစဉ်များကို ကြည့်ရှုခြင်းဖြင့် ဖန်တီးထားသူတို့၏ လူထုခေါင်းဆောင် တစ်ယောက်အပေါ် ထားရှိသည့် မေတ္တာ၊ သူတို့ကိုယ်တိုင် အကျဉ်းအကျပ်ထဲတွင် ရောက်နေသော်လည်း သူတို့ ထမ်းဆောင် နေသည့် သမိုင်းတာဝန်ကို ရုပ်လွတ်လပ်မှု နှင့် မိသားစုဘ၀ ကို စတေးပြီး ထမ်းဆောင်သွားမည့် မာန် စသည်တို့ကို ခံစားနိုင်သည်။

မနေသင့် မနေအပ်သည့်နေရာတွင် မနေထိုက်သူတို့ ရောက်ရှိနေရာ အရပ်၊ တရားမမျှတမှုများ ဖုံးလွှမ်းရာ အရပ်ကို မြန်မာနိုင်ငံမှ အကျဉ်းထောင်များက ညွှန်ပြနေသယောင် မြင်တွေ့နိုင်သည်။ နိုင်ငံရေးနဲ့ အကျဉ်းကျသူနေသူတွေ အတွက် အပ်နှင့် အပ်ချည် ကိုင်ဆောင်ဖို့ ခက်ခဲပြီး သူတို့အတွက် ယခုလို အ၀တ်ပန်းချီကားကို ရေးထိုးဖို့ရာ့  မလွယ်ကူတာအမှန်ပင်။

ထိုသို့ အခက်အခဲ ပေါင်းစုံကြားမှ ပြည့်သူ့ခေါင်းဆောင်ကို မမေ့လျော့သည့် စိတ်နှင့် ရေးထိုးပေးထားသော ပန်းချီကားလေးမှာ နိုင်ငံအတွက် အကျဉ်းကျနေသူ အားလုံး၏ စိတ်ကိုဖော်ဆောင် ပေးနေသကဲ့သို့ပင် ဖြစ်လေသည်။ ထို့အပြင် ပြင်ပကမ္ဘာမှ ခေတ္တ အမေ့ခံနေရသူတို့ရဲ့ ၀မ်းနည်းဖွယ် ပုံရိပ်လည်း ဖြစ်သည်။

`ထောင်ဆိုတဲ့ အရပ်က မကောင်းမှန်း သိတယ်၊ ကြောက်တယ် ဒါပေမဲ့ ကိုယ်ဒီအရပ်ကို ရောက်ခဲ့ရတာဟာ အမှန်တရားအတွက် ဆိုတော့ မပျော်ပေမဲ့ ပျော်အောင်နေတတ်ခဲ့ပါတယ်´ ဟု NLD ရုံးမှ နိုင်ငံရေး အကျဉ်းသားဟောင်း တစ်ဦးက ပြောသည်။


မြန်မာနိုင်ငံ၏ မပြီးဆုံးနိုင်သေးသည့် တိုင်းရင်းသားလူမျိုးစု ပြဿနာ၊ ဆင်းရဲမွဲတေမှု ပြဿနာများနှင့် နိမ့်ကျနေသည့် လူမှုရေး၊ ကျန်းမာရေး၊ ပညာရေး စသဖြင့် ဖြေရှင်းစရာ အခက်အခဲ ပေါင်းစုံက ဒီရုံးခန်းက ကုလားထိုင်မှာ ရုံးထိုင်မယ့် ဒေါ်အောင်ဆန်းစုကြည်ကို စောင့်လင့်နေသည့် အသွင်မျိုး ခံစားရသည်။

ထည်ဝါမှုမပါ ခေတ်မှီ အသုံးဆောင်များမရှိ ရိုးစင်းတဲ့ အပြင်အဆင်နှင့် ဒီစားပွဲငယ်လေးတွင် ထိုင်ပြီး ပြည်သူတို့၏ မျှော်လင့်ချက်၊ ယုံကြည်ချက်တို့ကို ဒေါ်အောင်ဆန်းစုကြည်က လူထုနှင့် လက်တွဲပြီး ဒီနေရာမှ ရင်ဆိုင် ဖြေရှင်းသွားလိမ့်မည် ဖြစ်သည်။

ရုံးခန်းမှ ပြန်ထွက်အလာတွင်တော့ NLD ပါတီဝင်များ၊ NLD ကို အားပေးသူများ၏ မျှော်လင့်ချက်နှင့် တောက်ပနေသည့် မျက်နှာများကို ဖြတ်သန်းပြီး ရွှေဂုံတိုင်ရုံးချုပ် အပြင်ကို ရောက်ရှိခဲ့ပါသည်။

Credit to Moemaka: http://moemaka.blogspot.com/2010/11/daw-suus-office-room.html

0 Comments to အမေ့ မခံလိုသူများရဲ့ လက်ဆောင်နဲ့ အမေ့ရဲ့ရုံးခန်း

Post a Comment