သင်းအောင် Saturday, 11 June 2011 19:22
ထိုင်း-မြန်မာ နယ်စပ်မှတဆင့် မြန်မာပြည်တွင်းသို့ ဝင်ရောက်မည့် ကားများ (ဓာတ်ပုံ - ဧရာဝတီ)
“(လိုင်စင်မဲ့ယာဉ်တွေကို) ရန်ကုန်နဲ့ ပဲခူးက အရာရှိကြီးတွေ ပိုင်ဆိုင်တဲ့ ခြံကျယ်တွေ၊ အစိုးရနဲ့ ပနံသင့်တဲ့ ဘုန်းကြီးကျောင်း တိုက်ဝင်းတွေထဲမှာ လတ်တလော သိမ်းထားကြတယ်” ဟု ကား အရောင်းအ၀ယ်သမား တဦးက ပြောသည်။
လိုင်စင်မဲ့ယာဉ် ၅ စီးမှ ၁၀ စီးအထိ စုစည်းမိပါက နေပြည်တော်သို့ ညသန်းခေါင်အချိန်တွင် ပို့ဆောင်လေ့ရှိကြောင်း သိရသည်။
ယခုနှစ်မှစ၍ အခွန်ပေးဆောင်ခြင်း၊ တရားဝင် လိုင်စင် ရယူခြင်းတို့ကို နေပြည်တော်တွင် ပြုလုပ်ပေးမည်ဟု သတင်းရရှိသည်။
မြန်မာနိုင်ငံတွင် မော်တော်ယာဉ်တန်ဖိုးက လိုင်စင်၏ တန်ဖိုးထက် အဆမတန် နည်းပါးနေသည်။
ကျပ် သိန်း ၇၀၀ ကျော် တန်ကြေးရှိသော မတ်ခ်တူး ၂၀၀၀ မိုဒယ် တစီးလျှင် လိုင်စင်မဲ့ယာဉ်ဈေးကွက်တွင် သိန်း ၆၀ ခန့် ဖြင့် ၀ယ်ယူနိုင်ကြောင်း၊ တိုယိုတာ ကိုရိုလာ ဗင်၊ စပရင်တာ၊ ဆန်နီဆူပါဆလွန်း စသည့် အမျိုးအစားများမှာ ၂၅ သိန်း၊ သိန်း ၃၀ ခန့်ဖြင့် အရောင်းအ၀ယ်ဖြစ်နေကြောင်း သိရသည်။
ရန်ကုန်၊ ပဲခူးနှင့် နေပြည်တော် လမ်းပိုင်းများတွင် စစ်ဆေးမှုများ ရှိနေသော်လည်း လိုင်စင်မဲ့ယာဉ်များကို နိုင်ငံပိုင်အဖြစ် သိမ်းဆည်းခြင်း မရှိကြောင်း သိရသည်။ ထိုအခြေအနေများကြောင့် နေပြည်တော်သည် ကားမှောင်ခိုသမားတို့၏ ဘူမိနက်သန်ဖြစ်နေသည်ဟူသော သုံးသပ်မှုများ ပေါ်ထွက်နေသည်။
“တစီး ၁၀ သိန်း၊ ၁၅ သိန်း ပေးလိုက်ရင် လတ်တလော သယ်ဆောင်ခွင့် ပြုတဲ့ သဘော ရှိနေတယ်” ဟု ရန်ကုန်မှ ကားအရောင်းအ၀ယ်သမားတဦးက ပြောသည်။
ကားများ တင်သွင်းမှုကို ထိုင်းမြန်မာနယ်စပ်တွင် အများအပြား တွေ့ရသည်။
ပြည်ပမှ တရားမ၀င် သွင်းလာသော မော်တော်ယာဉ်များအား ကာလတန်ဖိုး၏ ၈၅ ရာခိုင်နှုန်း အခွန်ဆောင်စေခြင်း၊ ဒဏ်ကြေး ၁၅ သိန်း ၅ သောင်း ပေးဆောင်စေခြင်းများ ပြီးစီးပါက လိုင်စင်ပြုလုပ်ပေးသည့် အစီအစဉ်ကို ယမန်နှစ် ဇူလိုင် ၂၃ ရက်တွင် စတင်ခဲ့သည်။
သို့သော် ဒဏ်ကြေး ပေးရမည် ဟူသော သတ်မှတ်ချက်ကို သြဂုတ် ၁၁ ရက်တွင် ပြန်လည် ရုပ်သိမ်းခဲ့သည်။ လိုင်စင် လျှောက်ထားသူ နည်းပါးလာသည့် အတွက် ရုပ်သိမ်းခြင်းဖြစ်သည်ဟု သိရသည်။
ထိုစဉ်က လိုင်စင်ထုတ်ပေးခြင်း အစီအစဉ်သည် ၂ လ ကြာမြင့်ခဲ့ပြီး စက်တင်ဘာ ၂၃ ရက်တွင် အဆုံးသတ်ခဲ့သည်။
Credit: Irrawaddy
http://www.irrawaddy.org/bur/index.php/news/6581-2011-06-11-12-25-14
