သူတို့ဘာလို့ ဒီလိုမေတ္တာပို့ကြွချီလာကြသလဲဆိုတော့ သြဂုတ်လဆန်းက စစ်အစိုးရကနေ လောင်စာဆီဈေးတွေအဆမတန်ဈေးမြှင့်ခဲ့လို့ နိုင်ငံတဲ့အ၀ှမ်းမှာ ကုန်ဈေးနုန်းတွေခုန်ပျံတက်ခဲ့လို့ မြန်မာပြည်သားတွေ အကြပ်အတည်းဖြစ်ခဲ့တာကို အခြေပြုတယ်လို့ဆိုရမှာပါ။ ပခုက္ကူသံဃာတော်တွေ စီတန်းကြွချီနေချိန်မှာ လောင်စာဆီဈေး ကျဆင်းရေးအတွက် လူထုပူးပေါင်းဖို့ တိုက်ပွဲဆင့်ခေါ်ခဲ့တဲ့ ကိုထင်ကျော်၊ ချီတက် လမ်းလျှောက်ခဲ့တဲ့ ကိုမင်းကိုနိုင်တို့ ၈၈ ကျောင်းသားတွေ လှုပ်ရှားမှုကြောင့် ရန်ကုန်မှာ အဖမ်းခံခဲ့ပြီးဖြစ်ပါတယ်။
ပခုက္ကူ သံဃာတော်တွေမေတ္တာပို့ စီတန်းကြွချီတဲ့ရှေ့ဆုံးမှာလဲ လောင်စာဆီဈေးနုန်းကျဆင်းရေးတောင်းဆိုလို့ ဖမ်းခံရသူတွေပြန်လွှတ်ပေးဖို့ကုန်ဈေးနုန်းကျဆင်းရေးလုပ်ပေးဖို့ နိုင်ငံတ၀ှမ်းမငြိမ်းမချမ်းဖြစ်နေတာတွေကို တွေ့ဆုံဆွေးနွေးအဖြေရှာဖို့ စတဲ့တောင်းဆိုချက်ဆိုင်းဘုတ်ကို ကိုင်ဆောင်ကြွချီခဲ့တာပါ။ အားလုံးသောသံဃာတွေရဲ့ စိတ်ထဲမှာ မေတ္တာဓါတ်တွေအပြည့်ကိန်းအောင်းပြီး ရွတ်ဖတ်ကြွချီနေတယ်ဆိုတာ ကိုယ်တော်တွေရဲ့ မျက်လုံးတွေကနေ အဓိပ္ပါယ်ကို အလွယ်တကူဖတ်လို့ရနေပါတယ်။
ဒီလို ငြိမ်းငြိမ်းချမ်းချမ်းကြွချီနေတဲ့ မြင်ကွင်းကို ဖျက်စီးလိုက်တာကတော့ တပ်မ (၁၀၁) က ဗျူဟာမှူး ခင်မောင်ထွေးနဲ့ ခမရ (၂၃၅) က တပ်ရင်းမှူး မျိုးသန့်ဇင် အပါအ၀င် တပ်သား (၂၀) လောက်ပဲဖြစ်ပါတယ်။
သံဃာအားလုံး မြို့လယ် ဆေးရုံ၂ရုံကြား မီးပွိုင့်ကိုရောက်တဲ့အချိန်မှာ မြို့နယ်သံဃမဟာနာယကက ဦးတေဇောဆိုတဲ့ ဆရာတော်ရောက်လာပြီး ဒီကောင်ဖမ်း ဟိုကောင်ဖမ်းအမိန့်ပေးတော့ စစ်တပ်က သေနတ်တွေမိုးပေါ်ထောင်ဖေါက်ပြီး ၀င်ဖမ်းတော့တာပါဘဲ။ သံဃာတွေဖရိုဖရဲဖြစ်ကုန်ပြီး တွေ့ရာအပေါက်ကနေအကုန်ပြေးရတော့တာပါဘဲ ။
အဲဒီအချိန်မှာ စစ်သားတွေက ဘုန်းကြီးတွေကို ၀င်ဖမ်းတော့ ဘယ်ကထွက်လာမှန်းမသိတဲ့ ကြံ့ဖွတ်တွေလည်း သူတို့ဘက်က၀င်ကူပြီး သံဃာတွေကို ၀င်ဖမ်းကြပါတယ်။ အဲဒီညနေမှာ အနောက်တိုက်လို့ခေါ်တဲ့ သာသန၀ိပုလာရာမတိုက်က ဦးဇင်း ဦးပညာစက္ကနဲ့ ဦးပညာနန္ဒ၊ ဗောဓိမဏ္ဍိုင်ကျောင်းတိုက်က ဦးစန္ဒိမာတို့ အဖမ်းခံခဲ့ရပါတယ်။ ကျန်တဲ့ ကိုယ်တော်တွေကတော့ အနီးဆုံးဆေးရုံတွေ အလယ်တန်းကျောင်းတွေ နီးစပ်ရာအိမ်တွေနဲ့ အရှေ့တိုက် (မဟာဝိဇယာရာမ)ထဲ ၀င်ပြေးလွတ်မြောက်ခဲ့ကြပါတယ်။
အချိန်ကလည်း ညနေစောင်းနေပြီ အရှေ့တိုက်ထဲကသံဃာအားလုံးစုပြီး ဖမ်းထားတဲ့ ကိုယ်တော်အားလုံးလွှတ်ပေးဖို့ မလွှတ်ပေးရင် ဆက်ပြီးဆန္ဒပြဖို့ဆုံးဖြတ်ကြတယ်။ အရှေ့တိုက်မြောက်ဘက်မုခ်ပေါက်မှာ သံဃာအားလုံးစုပြုံနေတယ် လမ်းတဖက်မှာတော့ အရပ်ဝတ်ရဲတွေ ကြံ့ဖွတ်တွေစီတန်းရပ်နေတယ်။ အရှေ့တိုက်ဘက်က သံဃာအုပ်နဲ့ လူအုပ်က ကြံဖွတ်အုပ်ဖက်ကို ခဲတွေနဲ့ထုလိုက် ဟိုကနောက်ဆုတ်လိုက် ရှေ့တိုးလိုက်နဲ့ အတော်မိုးချုပ်ထိလုပ်နေခဲ့ကြတယ်။ မှောင်လာတော့ အရှေ့တိုက်က တိုက်အုပ်ဆရာတော်တွေနဲ့ မြို့ပေါ်က ဆရာတော်တွေကို အာဏာပိုင်တွေက အလက(၃) ကျောင်းမှာပင့်ပြီး ဖမ်းထားတဲ့ သံဃာတွေကိုလွှတ်ပေးမယ် ကျန်သံဃာတွေကို ထိမ်းပေးပါဆိုတဲ့ သဘောတူညီချက်နဲ့ ဖမ်းထားတဲ့ သံဃာ ၃ပါးလွှတ်ပေးခဲ့ပါတယ်။
ပြန်လွတ်တဲ့ သံဃာတော်တွေပြောပြချက်အရ သူတို့ဆေးရုံအိမ်သာထဲဝင်ပုန်းနေတုန်း ကြံ့ဖွံ့အတွင်းရေးမှူး လှဝင်းနိုင်က “ဟိုထဲမှာ (၂) ကောင်ပုန်းနေတယ်၊ ဖမ်းဖမ်း” ဆိုပြီး ပြောတယ်လို့ သိရပါတယ်။ “နှစ်တစ် ခင်မောင်ဝင်းဆိုတဲ့ လူမိုက်ကလည်း ငါတို့ကို ၀င်ရိုက်တယ်။ စစ်သားတွေကလည်း သေနတ်ဒင်နဲ့ထုတယ်။ ဒါတွေပြီးမှ ရဲစခန်းထဲ လူဝတ်လဲပြီး၊ အချုပ်ခန်းထဲ ထည့်ခဲ့တယ် နောက်မှအထက်အမိန့်ဝင်လာလို့ သင်္ကန်းပြန်ဝတ်ပေးပြီး လွှတ်ပေးလိုက်တာ” လို့ပြောပါတယ်။
နောက်နေ့မနက်မှာ တိုင်းသာသာနာရေးဦးစီးနဲ့ ခရိုင်အဆင့်ဆင့်က တာဝန်ရှိသူတွေဟာ စာသင်တိုက်တွေကို ၀င်ပြီး လှုပ်ရှားမှုတွေမှာ မပါဖို့ ၀င်လျှောက်တော့တာပဲ။ ဒီမှာတင် လောလောလတ်လတ် ခံထားရတဲ့ သံဃာ တော်တွေက မကျေနပ်လို့ အလယ်တိုက်အရောက်မှာ ၀န်းတံခါးပိတ်ပြီး အာဏာပိုင် (၁၃) ယောက်ကို ဖမ်း လိုက်တယ်။ သူတို့စီးတဲ့ ကားတွေကို မီးရှို့ဖျက်ဆီးခဲ့တယ်။ ကျနော်ကတော့ လူငယ်အတွေးနဲ့ ဒီလိုလုပ်တာမမှားဘူးပဲ ထင်ပါတယ်။
နောက်နေ့တွေမှာတော့ နိုင်ငံပိုင်သတင်းစာတွေက ဒီဖြစ်စဉ်တွေဟာ နိုင်ငံရေးတက်ကြွသူတွေနဲ့ မီဒီယာတွေပေါင်းပြီး လုပ်ကြံဖန်တီးတာပါလို့ ရေးခဲ့ ပြောခဲ့တယ်။ အဓိကဖြစ်တဲ့ မေတ္တာပို့ကြွချီိတဲ့ သံဃာတော်တွေကို ဓာတ်တိုင်မှာ ကြိုးတုတ်ပြီး ရက်ရက်စက်စက် ရိုက်ခဲ့တာကိုတော့ တလုံးတပါဒမှ မဖေါ်ပြခဲ့ပါဘူး။
ဒီနောက်တော့ တနိုင်ငံလုံးက သံဃာတွေက ပခုက္ကူသံဃာတော်တွေကျေနပ်အောင် အစိုးရကတောင်းပန်ပို့ မတောင်းပန်ရင် ပတ္တနိက္ကုဇ္ဇန ကံဆောင်မယ်ပေ့ါ။ ဒါကို အာဏာကလွဲပြီး ဘာမှ ဂရုမစိုက်တဲ့ ငမိုက်သားတွေက မတောင်းပန်ဘူးလေ။ ဒီနောက်တော့ နိုင်ငံအနှံ့ စက်တင်ဘာ (၁၈) မှာ “လူအချင်းချင်း နိပ်စက်ချင်း ကင်းရှင်းကြပါစေ ဥပဒ်ရန်ဘေး ကင်းစင်ဝေး ငြိမ်းအေးကြပါစေ ဆင်းရဲလိုခြင်း အချင်းချင်း ကင်းရှင်းကြပါစေ ဒို့မေတ္တာစွမ်းကမ္ဘာလွှမ်း ငြိမ်းချမ်းကြပါစေ ” ဆိုတဲ့ မေတ္တာပို့သံတွေ ကမ္ဘာကိုလွှမ်းသွားခဲ့တာပါ။ ရွှေဝါရောင်လို့ ကမ္ဘာကသိတဲ့ သံဃာလှုပ်ရှားမှုကြီး ပေါ်လာရတော့တာပါပဲ။
ဒီလိုသံဃလှုပ်ရှားမှုပေါ်နေချိန်မှာ ပခုက္ကူ မဟန ဦးတေဇောလို နအဖအလိုကျ ကပြအသုံးတော်ခံခဲ့တဲ့ ဘုန်းကြီးပေါ်လာသလို ပဲခူးမှာ ကြခတ်ဝိုင်းဆရာတော် ဦးဇောတိပါလ ဆိုတဲ့ မင်းကိုးကွယ်ဆရာတော်က သံဃာနဲ့နိုင်ငံရေးမအပ်စပ်ဆိုပြီး သားသုံးသားရှင်းလင်းရေး စေခိုင်းချက်ထွက်လာပြီးတဲ့နောက် သံဃာတွေကို နှိပ်ကွပ်တော့တာပါဘဲ။
ဒီနေရာမှာ သံဃာနဲ့ နိုင်ငံရေးမအပ်စပ်ဆိုတဲ့ စကားကိုကျနော်နားလည်သလောက် လက်လှမ်းမှီသလောက် ရှင်းပြချင်ပါသေးတယ်။ ပခုက္ကူသံဃာတော်တွေ ဖြိုခွင်းခံရတဲ့ စက်တင်ဘာ ၅ ရက်က ဦးဆောင်ဆရာတော်တပါးကို အဖမ်းမခံရအောင် ကျနော်လိုက်ပို့တုန်းသူပြောတဲ့ စကားလေးအမှတ်ရမိပါတယ်။
“ဒကာရာ ဦးဇင်းတို့က အိမ်တွေဝင်ထွက် ဆွမ်းခံနေတော့ ဒကာတွေ အခြေအနေသိတယ်။ အရင်က (၅) အိမ် လောက် ဆွမ်းခံရင် ကျုပ်တို့သပိတ်ပြည့်ပြီ။ အခု (၁၅) အိမ်လောက်ခံမှ တပါးစာ ၀ရုံလောက်ရှိတယ်။ ကျုပ်တို့ ခေါင်းရိတ်ဖို့ ဓားတချောင်းတောင် အပိုမ၀ယ်နိုင်တော့ဘူးဗျာ။ ဒါ ... ဒကာတွေ မွဲနေပြီဆိုတာ ကျုပ်တို့သိလို့ မေတ္တာပို့တာပါ။ ကျုပ်တို့မှာ အပြစ်ရှိသလားဗျာ” တဲ့ ကိုင်း လူထုအခြေအနေကို အတွင်းကျကျသိနေတော့ သံဃာတွေနေလို့ရမလား အဆင်ပြေတဲ့အိမ်တွေပဲ ရွေးဆွမ်းခံရမလား ဒီလိုပဲ ၀ိုင်းကူဖြေရှင်းသင့်လား လူသားစိတ်ရှိသူတိုင်း ဖြေရှင်းပေးချင်စိတ်ရှိကြမှာပါ။ သံဃာဆိုတာ ငြိမ်းချမ်းသောနည်းနဲ့ ပြည်သူ့ဘ၀ အေးချမ်းသာယာအောင် မေတ္တာနဲ့ ဖြေရှင်းတာ ဘုရားရှင်လက်ထက်ကတည်းက ရှိခဲ့တာပါ။
ဥပမာတခုပြောရရင် မဇ္ဈိမဒေသမှာ ကပိလဝတ်နဲ့ ကောလိယ နှစ်ပြည်ထောင်မင်းသားတွေက ရောဟဏီမြစ်ကရေကို လုကြတဲ့ အဖြစ်အပျက်တစ်ခု ဖြစ်ပေါ်ခဲ့ဘူးပါတယ်။ သူတို့ရဲ့ စိုက်ပျိုးမြေတွေအတွက်
ဒီမြစ်ရေကို သူယူမယ် ငါယူမယ် ဆိုပြီငြင်းကြခုန်ကြရာက စစ်ခင်းကြမဲ့အခြေ အနေအထိ ရောက်နေချိန်မှာ ဗုဒ္ဓဘုရားရှင်ကိုယ်တိုင် ၀င်ဖြေရှင်းပေးခဲ့လို့ ပြေလည်ခဲ့ဘူးတဲ့ သာဓကတွေရှိခဲ့ပါတယ်။
ဒီလိုအလားတူပဲ ပုဂံခေတ်မှာဆိုရင် ရှင်ဒိသာပါမောက်လို့ သံတမန်ရေးကျွမ်းကျင်တဲ့ အရှင်သူမြတ် အင်းဝခေတ်မှာ စကြိုသူမြတ်လို ပုဂ္ဂိုလ်ထူးတွေကြောင့် ငြိမ်းချမ်းရေးရခဲ့တဲ့ သာဓကတွေရှိခဲ့သလို ဒီဘက် ကိုလိုနီခေတ်မှာလည်း ဦးဥတ္တမလို ဦးဝိစာရလို့ သာသန အာဇာနည်တွေကရော့ ဘာကြောင့်အသက်ပေးပြီး နိုင်ငံနဲ့ ပြည်သူ့အရေးလုပ်ခဲ့လဲဆိုတာတွေက အတုယူစရာတွေပါ။
ဒီတော့ ကျနော့်တို့ နိုင်ငံမှာ အာဏာရှင်ဆိုသူတွေ ရှိနေသေးသရွေ့ မြေရှိလျှက်ပြေးနေရသူတွေ အမေရှိလျှက်ဝေးနေရသူတွေ။ မတရား စော်ကားခံရမှုတွေ၊ ဖိနှိပ်ခံရတာတွေ ရှိနေဦးမှာ မလွဲပါဘူး။ ဒါတွေကို သံဃာထုအပါအ၀င် လူထုက ကိုယ့်ရပိုင်ခွင့်အတွက် နည်းလမ်းပေါင်းစုံနဲ့ တိုက်ပွဲဝင်နေရဦးမှာပါ။
လူဦးရေ သန်း (၆၀) ကျော်တဲ့ ပြည်သူက လက်တဆုပ်စာအာဏာရှင်ကို မနိုင်ဘူးဆိုတာ ရာဇ၀င်ရိုင်းပါတယ်။ ခုအစိုးရသစ်က လုပ်နေပါတဲ့ဆိုတဲ့ ရွှေရည်စိမ်ငြိမ်းချမ်းရေး မဖြစ်စလောက်ပြုပြင်ပြောင်းလဲမှုလေးတွေမှာ မျောမနေစေချင်ပါဘူး။ ကျနော်တို့ ရည်ရွယ်ချက်ပန်းတိုင်ဟာ အာဏာရှင် မြန်မာ့မြေပေါ်က အပြီးတိုင်ချုပ်ငြိမ်းရေးဆိုတာကို အစဉ်ရှေးရှုပြီး ချိနဲ့သူကိုဖေးကူ၊ အားနည်းသူကို လက်တွဲ၊ စည်းလုံးညီညာတဲ့ စိတ်ဓာတ်တွေနဲ့ တိုင်းပြည်အတွက် ဘာသာသာသနာအတွက် အမြန်တိုက် ပွဲဝင်သွားကြပါစို့လို့ တိုက်တွန်းလိုပါတယ်။
ခေတ်အဆက်ဆက်က အာဏာရှင်တိုက်ပွဲတွေမှာ ကျဆုံးခဲ့တဲ့ အာဇာနည် ရဲဘော်အပေါင်း၊ စက်တင်ဘာ သံဃာ့လှုပ်ရှားမှုအတွင်း ကျဆုံးသွားတဲ့ ရဟန်းရှင်လူ ကျောင်းသားပြည်သူအပေါင်းနဲ့ ထောင်တွင်း အကျဉ်းချခံ ထားရတဲ့ ရဲဘော်အပေါင်းကို ဒီဆောင်းပါးနဲ့ ဦးညွတ်အလေးပြုလိုက်ပါရစေ။
ပခုက္ကူ သံဃလှုပ်ရှားမှု ကာလက ထွက်ပေါ်လာတဲ့ကဗျာလေးနဲ့ ကျနော့်ဆောင်းပါးကို အဆုံးသတ်လိုက်ပါတယ်။
ဘိက္ခုသစ္စာ
ပြည်သူ့ သင်္ကန်း၊ ပြည်သူ့ဆွမ်းဖြင့်
သင်္ခန်းကျောင်းမှာ ၊နေတုံပါလည်း
မြန်မာပြည်ဝှမ်း၊ တရားစွမ်းဖြင့်
ချမ်းသာအောင်မှ၊ မဆုံးမလျှင်
သံဃာ့တာဝန်၊မကျေပွန်မို့
တာဝန်ကျေပ ၊ဆန္ဒပြသည်
မှန်ပ ဆွမ်းဖိုး၊ ကျေစေသောဝ် ။ ။
ဇာနည်(ပခုက္ကူ)
သာသသနာ့ဥသျှောင် အဖွဲ့မှထုတ်ဝေမယ့် စက်တင်ဘာ ရွှေဝါရောင် အမှတ်တရ စာအုပ်အတွက် ရည်ရွယ်ရေးသားပါသည်။
Post a Comment